WIRED CAFE (尖沙咀)

Wired Cafe 提供新派日本輕食，係日本都有成50幾間分店，可惜係香港就只有2間。今日難得星期五同朋友聚舊，又剛好要黎尖沙咀買少少野，就決定黎呢到試下啦。夜晚7點幾黎到，仲有幾張檯未滿，唔洗等位住，真係好啦。

坐低之後就慢慢睇MENU啦，因為選擇太多，所以都花左一段時間去揀，最後揀左「明太子意大利粉」同埋「香草沙律風乾火腿薄餅」。落單果時侍應聽到我地只係叫2樣野時有點兒震驚，令我地諗，呢到D份量係咪好少既呢? 2個人叫2個會唔夠食? 但係當食物到既時候，謎底終於解開啦......

 

明太子意大利粉:意粉軟硬度同份量都好適中，醬汁香濃惹味，明太子粒粒分明，好足料，碟旁仲有一塊法包，整體賣相好吸引。

 

香草沙律風乾火腿薄餅: 上菜時俾佢巨型既Size嚇親，但睇真D其實佢都只不過係一個風乾火腿沙律放係薄脆既餅底上面，所以其實都唔係太多啫。風乾火腿唔太鹹，配上新鮮既蔬菜沙律，味道清新，口感又爽又脆，好好味，但係薄餅落既芝士有點兒過多，少返DD會更加好。 

openrice link: http://www.openrice.com/zh/hongkong/r-wired-cafe-%E5%B0%96%E6%B2%99%E5%92%80-%E6%97%A5%E6%9C%AC%E8%8F%9C-r123681

地址:  尖沙咀彌敦道118號Mira Mall地庫B13號舖

Espuma (尖沙咀)

平時周圍搵好野食，目的都係想搵一間有特色既餐廳， 自從上個月同朋友慶祝生日後試過西班牙菜之後就對佢念念不忘，今日為左祝賀朋友升職，黎左位於尖沙咀厚福街H8 既Espuma，地鐵站行過去都係5分鐘左右。

我地今次點左2個小食，一個Main Course 同一個甜品。

 

焦糖單骨雞翼: 呢個真係小食既首選，懶人同怕多骨既朋友一定會鍾意，單骨雞翼係超正架，仲好方便食，一條骨放入口， 好容易就食到D肉，雞翼既皮煎得幾脆，上面佈滿焦糖同蜜糖，味道香脆可口，亦都唔會炸得過乾。

特色粟米薄脆 (Nachos): 呢個小食絕對係吹水時必食架， 大大碟既墨西哥薄脆片，上面加左酸忌廉，牛油果醬， 酸瓜粒同蕃茄粒，非常搭配，咸中帶點清新嘅酸味，味道又清新又好味。粟米片好脆口，配上既醬料好夠夾，份量又多，好似食極都仲有，食極都食唔完咁，唯一美中不足既係D 醬料唔夠多，加多少少會更加好。

 

香脆咸豬手: 呢個咸豬手好似好出名咁，見好多檯都有叫，可惜等候需時，不過值得一讚既係上菜時D咸豬手已經切好，食起黎都好方便，豬手皮都好脆，肉又夠嫩而且唔算肥， 雖然有醬汁跟，但係唔點都已經好夠味啦，加上唔點醬先至食到肉既鮮味，不用點醬都已經很夠味了。至於份量方面，係絕對夠2-3個人享用既。

奧利朱古力布朗尼窩夫配雪糕 (半份): 對於好多女仔黎講，甜品先係一餐飯既主角，呢到既甜品有好多款式，不過大部分都係窩夫，我地叫左半份奧利朱古力布朗尼窩夫配雪糕，估唔到半份都幾大份。

窩夫蛋味濃郁，脆卜卜咁，好好味，至於雪糕口感creamy，朱古力味又唔會太濃，最欣賞既係插係雪糕上面既杏仁脆片，口感香脆，配埋雪糕一齊食味道真係好夾。至於朱古力布朗尼，大約有5-6小粒，朱古力味都好香濃，口感都幾軟身。除左布朗尼同雪糕之外，仲有Cream 同埋吉士醬係旁邊襯托，成個甜品不論賣相同味道都相當吸引。

呢間Espuma帶俾人一種好休閒既感覺， 食物款式都算多，同三五知己一齊黎食野傾計真係唔錯!!

openrice link: http://www.openrice.com/zh/hongkong/r-espuma-%E5%B0%96%E6%B2%99%E5%92%80-%E5%A4%9A%E5%9C%8B%E8%8F%9C-%E7%94%9C%E5%93%81-%E7%B3%96%E6%B0%B4-r175038

地址:  尖沙咀厚福街8號H8 2樓

Greyhound Cafe (中環)

是日星期日，踏入秋天既季節，正係行山既好時候，今日係同朋友們行山之前黎到食泰國fusion 菜既Greyhound到食午餐，為左唔想等位，我地預早一日已經BOOK 定檯。

薄切三文魚配泰式酸辣汁: 質感肥美既三文魚配上泰式酸辣汁，加入刁草、生蒜片、泰式辣醬等，出奇地夾，味道新奇好味！

鮮蝦炒金邊粉: 上菜已經聞到好香，金邊粉比較乾身，唔太油，加入鮮蝦，洋蔥同蛋，炒得好入味，仲有青檸, 花生, 芽菜同埋辣粉放係碟旁，撈埋一齊食真係食到佢既香味，食落有多重口感!

泰式辣汁青木瓜沙律: 青木瓜沙律口感爽甜，配合同樣爽脆既紅蘿蔔絲同埋泰式辣汁，酸得黎仲帶微辣，帶俾我地清新既感覺，真係一個幾開胃既前菜。 

openrice link: http://www.openrice.com/zh/hongkong/r-greyhound-cafe-%E4%B8%AD%E7%92%B0-%E6%B3%B0%E5%9C%8B%E8%8F%9C-%E7%84%A1%E8%82%89%E9%A4%90%E5%96%AE-r67347

地址:  中環港景街1號國際金融中心1樓1082舖

居食屋「和民」 (旺角)

久不久既ladies'night，2個女仔一齊多數都係食日本野，今次我地揀既係和民。

雖然見到個2人餐好抵好多野食，但係實在份量太多，2個女仔無可能食得晒，所以最後都係散叫，叫左2個主菜加一個小食。

牛肉鍋燒烏冬: 雖然本人唔食牛肉，但係我都有試過D烏冬同湯底，鍋燒烏冬湯底味道夠哂濃，烏冬幾有口感，不過配菜就實在太少啦。

東京滑蛋豬扒飯: 呢個飯有分大同細2個SIZE，眼闊肚窄既我地揀左個大既，最後食唔晒。滑蛋豬扒飯上檯一睇就覺得好吸引啦，豬扒厚身大件，咬落去外皮半硬半軟，肉質又鬆化又有口感，而佢個半生熟亦有蛋汁既滑蛋又有好濃郁嘅蛋香味，真係天衣無縫嘅配合。

關西章魚丸子: 粒粒燒好既八爪魚, 入面仲係岩岩好半熟既狀態，上面加上燒汁，沙律醬同會動既木魚絲，大大粒，超級正，不過一份有成8粒，2個女仔share2個主菜後再食呢個小食最後都係食唔晒。 

openrice link: http://www.openrice.com/zh/hongkong/r-%E5%B1%85%E9%A3%9F%E5%B1%8B%E3%80%8C%E5%92%8C%E6%B0%91%E3%80%8D-%E6%97%BA%E8%A7%92-%E6%97%A5%E6%9C%AC%E8%8F%9C-%E5%A3%BD%E5%8F%B8-%E5%88%BA%E8%BA%AB-r110916

地址:  旺角彌敦道639號雅蘭中心2樓208號舖

霜月 (銅鑼灣)

是日同朋友們返完教會後就黎到開張無耐既「霜月」一試。

餐廳位於銅鑼灣霎東街OLIV既24樓，地鐵站行過去都只不過係2分鐘，環境寛躺優雅，裝潢都相當日式。 

坐低之後侍應好快就為我地端上熱茶，我地亦都好快落左單。

每個是日午餐都會包一個沙律，一個蒸蛋，一個味噌湯同埋一個甜品既。 

沙律菜好新鮮同爽脆，除左加左胡麻醬之外，仲加左少少飯素，味道好特別，我都係第一次咁樣食，至於醬汁比例適中，令人好開胃。

味噌湯味道唔會過重，可惜湯料相對較少，建議加多少少豆腐同海帶。 

日式蒸蛋有別於平時食到果D，呢到既蒸蛋內有蟹肉，蝦肉同魷魚，口感非常滑溜，值得推介。 

吞拿魚腩日本海膽丼: 吞拿魚腩新鮮而唔膩，海膽油油甘香，軟滑甘甜而肥美，彈出鮮鹹香味，加埋又大又厚既玉子，配上日本珍珠米煲出黎既飯，點上少少Wasabi同豉油，真係令人一試難忘。 

北海道丼:所謂既北海道丼，除左係由上面已經提及過既海膽，玉子，同埋日本珍珠米煲出黎既飯整食之外，仲有唔少得既三文魚籽。呢到既三文魚籽晶瑩剔透又大粒，粒粒飽滿豐郁，味道一D都唔腥，唯一美中不足既係飯既份量比較少，男仕們可能會唔夠食。 

日本牛肉網燒定食:牛肉網燒定食可以揀日本牛肉或者係美國牛肉，當然價錢上都好大分別，反正今日都諗住豪返次，最後都係揀左比較貴既日本牛肉。日本牛肉肉質非常腍滑，肉香濃郁，肉汁都可以話一流水準，配埋又大碗又熱騰騰既日本飯真係完美配搭。

食完主菜之後就係上甜品既時候，甜品可以揀雪糕同綠茶卷，如果唔揀甜品既話都可以改要咖啡或茶既。我地三人最後要左一個柚子雪糕同埋兩個綠茶卷。 

柚子雪糕口感有D似雪葩，裡面有少少柚子顆粒，果味重而帶出清新既感覺。 

綠茶卷既海錦蛋糕同滑滑既忌廉都滲透濃濃而清新既綠茶味，入口甘香而不膩，賣相仲好吸引添。

3位埋單最後都要成$1100，的確有點兒貴，但係呢到環境優美，服務一流，仲有侍應不斷加茶，唯一美中不足既就係女洗手間入口比飛機既更窄，真係肥少少都入唔到去呀。  

openrice link: http://www.openrice.com/zh/hongkong/r-%E9%9C%9C%E6%9C%88-%E9%8A%85%E9%91%BC%E7%81%A3-%E6%97%A5%E6%9C%AC%E8%8F%9C-%E7%81%AB%E9%8D%8B-r439960

地址:  銅鑼灣霎東街15-21號OLIV 24樓

C.O.W. Dining (觀塘)

最近流行低溫慢煮，慢煮既好處是用低溫而長時間煮理，呢種方法能慢慢分解肉身纖維而令肉質更鮮嫩同保留更多肉汁。一直都想試低溫慢煮既我，最近上黎 OPENRICE見到C.O.W.既特點係自家製做意大利粉.優點係每日新鮮製做，不含防腐劑同色素。餐廳既老闆兼大廚入廚多年，曾於醫管局工作，負責病人膳食，深知慢煮對健康既好處，故與友人開設餐廳。 

今日同朋友黎試低溫慢煮，餐廳位於觀塘工廈，係觀塘同牛頭角兩個地鐵站中間。雖然餐廳位於工廈，但係環境都相當好，燈光比較暗，加上餐檯上既燭台令到氣氛都幾浪漫。值得一讚既係餐廳既洗手間非常清潔，令到客人有舒適既感覺。

餐牌有分3道菜同5道菜，我地揀左5道菜，有頭盤，餐湯，意粉，主菜，甜品，同埋咖啡或茶。 

因為想用個OPENRICE優惠，所以預早幾日訂檯，到左餐廳之後發現原來除左可以平30蚊之外，仲有個小食送。呢個小食係用Ricotta Cheese + sundried tomato 整成paste，再放係青瓜上面食，食落感覺好清新同開胃，連平時唔係點食芝士既我都食晒成個小食。

頭盤:

自家製醬汁凱撒沙律配挪威煙三文魚和慢煮紅菜頭: 凱撒沙律味道唔錯，醬汁份量適中，仲有一樣似係多士串既配菜，食落脆脆地咁，好特別，煙三文魚相對份量一D都唔少，味道都唔會太鹹。 

什凍肉碟配慢煮蘋果和季節性沙律菜黑醋汁:  蘋果賣相好吸引，顏色鮮艷，唔似有煮過咁，至於口感就比較爽脆，有D似雪梨咁，什凍肉一共有四款，肉質香腍而唔油。

餐湯:

餐湯有2款，我地一行2人一人叫左一款試。

蕃茄清湯既感覺好特別，酸酸地甜甜地，睇落仲好清，有少少似洋蔥湯咁。

野菌忌廉湯相對就普通D，但都好Creamy，更加無平時係餐廳食到既蘑菇雜粒，亦都唔鹹。

自家製麵包配黑橄欖醬+ 麵包條:麵包上檯時仲係暖暖地，聽侍應講原來係即日整架。

意粉:

自家製墨魚汁雲吞配帶子和海鮮: 呢到既意式雲吞同一般傳統既有少少唔同，咁大隻雲吞都係第一次試，自家製既雲吞皮咬落好爽滑，內裏包住帶子同切碎左既海鮮。 

自家製雲吞配和牛及牛肝菌: 煙煙韌韌既雲吞皮包住脹卜卜既饀料，和牛既鮮味加上牛肝菌既香味，感覺好優雅，至於醬汁做得好好，一D 油膩既感覺都無。 

 

主菜: 

慢煮挪威三文魚配粉紅胡椒和檸檬乳酪汁: 慢煮既三文魚都係第一次試，外表睇落煮得熟透，但原來切開厚厚既三文魚柳後裡面顏色係偏粉紅，魚身煎得好香，魚皮切開「卜卜」聲，魚既肉質非常鮮嫩，口感滑滑地，經過慢煮既三文魚肉質嫩滑， 仲好多肉汁，配上酸酸地既檸檬乳酪汁，同埋唔重牛油味既薯蓉，簡直係天作之合。 

慢煮美國牛肋條配法式紅酒汁: 牛肋條味道香而濃，肉質夠彈牙而且多汁，平時都好少食到呢種口感。紅酒汁酒味唔會太重，伴菜方面除左薯蓉之外，仲有一味係用矮瓜包入蘆筍同粟米，非常特別。

甜品:

梳孚里: 一上檯已經聞到陣陣香味, 梳孚里顏色呈金黃，蛋白打得夠輕身， 口感好滑，甜度適中，面頭糖霜既份量更加令個甜品賣相更加靚。

慢煮蘋果捲: 蘋果酸酸甜甜，果肉夠爽，加埋果仁同埋提子乾，用薄而微脆既酥皮包住，口感一流，加埋碟上既朱古力醬做裝飾，賣相好吸引。

食完五道菜既晚餐之後飲埋杯熱檸茶，為我地呢餐劃上完美既句號!! 

openrice link: http://www.openrice.com/zh/hongkong/r-c-o-w-dining-%E8%A7%80%E5%A1%98-%E8%A5%BF%E5%BC%8F-r434980

地址:  觀塘觀塘道396號毅力工業中心2樓F室

La Postre (上環)

好朋友生日，諗住同佢食個特別既晚餐慶祝，最後揀左位於上環A2出口轉右步行2分鐘，昌盛大廈三樓既餐廳。

揀呢間餐廳既其中一個原因，除 左LOCATION 適合我地之外，都因為同一商廈既一間餐廳之前入過OPENRICE 餐廳排行榜既頭十位，果時順帶睇埋同一大廈仲有咩食既同時，俾我發現呢間開左唔係太耐既西班牙菜餐廳，根據其他BLOGGER既COMMENTS，呢到既環境同食物都幾好咁。

「La Postre」其實係西班牙語，解作甜品的意思，不過我地當日唔係黎食甜品，而係晚餐。不竟都怕放工時候多人要等位，為左唔好令朋友失望，預早成10日BOOK 定檯，去到餐廳時，可能因為時間比較早，都唔算太多人。

餐廳用左粉藍色為主調，帶點希臘悠閒風格，鍾意望窗外景既朋友們可以選擇坐高櫈座位。好可惜既係本人被網民高技術既攝影技巧騙左，環境同感覺都無幾位BLOGGER 講到有幾浪漫同氣氛有幾好。 

西班牙海鮮飯相信係呢到既招牌菜，見好多BLOGGER都有叫，呢個飯有分2人或4人份量，我地2個人食當然叫左個2人份量啦。

上檯時熱辣辣，賣相都幾吸引，海鮮又多，有青口，大蝦同蜆，排得滿滿，望落真係好足料，驚喜十足! 底層的意大利飯吸晒海鮮湯同茄汁濃郁既味道同精華，軟綿綿，非常好吃又開胃，海鮮食落爽口彈牙又新鮮。至於飯既顏色就比一般既西班牙海鮮飯紅，似係落得比較多paprika。 

西班牙豬仔骨就真係無咩特別，無咩所謂「西班牙」既風味，成碟都係肉，唔係個個女仔都接受到，建議餐廳加少少沙律菜伴碟，賣相靚D之餘又健康，睇落都開胃D。 

2個人食完呢2樣野都好飽，叫唔到本身想試既蔬菜墨西哥玉米片(Nachos)，下次黎一定要試下。 

openrice link: http://www.openrice.com/zh/hongkong/r-la-postre-%E4%B8%8A%E7%92%B0-%E5%A4%9A%E5%9C%8B%E8%8F%9C-%E7%94%9C%E5%93%81-%E7%B3%96%E6%B0%B4-r451874

地址: 上環永樂街50號昌盛大廈3樓

新泰東南亞餐廳 (灣仔)

位於灣仔W Square 2/F的「新泰東南亞餐廳」，剛步出升降機，就見到裝修同擺設都極有泰國色彩。

餐廳入面既員工大部分都係泰國人，所以感覺上佢地既食物都應該係幾正宗既。

本身今日唔係太肚餓，唔多想食咁多有澱粉質既野，所以決定試下佢既沙律，菜同小食。 

泰國青芒果沙律: 本是想叫柚子蝦沙律既，但係見到有青芒果沙律又突然改變主意。呢個沙律係用削成幼條既芒果，加上酸酸地又帶微辣既泰式沙律汁，食落都幾開胃。 

蛹蝦: 感覺有點fusion, 外型都幾得意，係係蝦上面卷D麵再拎去炸咁，外脆內彈又香口，配上酸辣醬, 感覺好特別。 

泰珍珠椰菜苗炒香菇: 椰菜苗比想像中大棵，加埋香菇，味道鮮甜，菜既味道唔會太油或太鹹。 

蕉葉烤鱸魚: 鱸魚加上泰式香料，再以香蕉葉包裹焗製，鱸魚係烤既過程就會吸收左各種香料既味道。鱸魚上菜時仲係俾蕉葉包住，要等侍應黎幫忙打開。鱸魚食落有少少香蕉葉既清香，可惜鱸魚太多骨，食食下無心機食。

openrice link: http://www.openrice.com/zh/hongkong/r-%E6%96%B0%E6%B3%B0%E6%9D%B1%E5%8D%97%E4%BA%9E%E9%A4%90%E5%BB%B3-%E7%81%A3%E4%BB%94-%E6%96%B0%E5%8A%A0%E5%9D%A1%E8%8F%9C-%E5%92%96%E5%96%B1-r189148

地址:  灣仔軒尼詩道314-324號 W Square 2樓