鍾意食川菜既我，最近試過一家小店既干鍋之後就對佢念念不忘，之後就四周圍搵同類型既野試下喇。
位於天后興發街既「十二味不只是烤魚」，門面非常有特色，店外有一幅七彩繽紛既牆，內在環境以魚為主題，座位都好寬敞，通風效果唔錯，唔會有好大陣油煙味。
餐牌上選擇好多，因為想試多D唔同既菜式，所以都唔想叫太多易飽既食物。
川式口水雞 :
口水雞辣味適中，聞落好香，雞肉都好嫩，加埋香脆既花生，令人一件接一件咁食。
麻辣豬耳 :
切至幼身既豬耳，入口非常爽，麻辣並重，食落好刺激，加埋芫茜同埋花生，口感同味道都非常豐富。
悶燉兒麻辣香鍋 :
既然呢個香鍋係招牌菜，又點可以唔試下呢? 香鍋有好多料，田雞、 魷魚、雞胗、蝦、萵筍、土豆條同埋午餐肉，當然唔少得大量辣椒啦，初初見到咁多辣椒都有d驚個鍋會好辣，好彩最後唔單止辣度適中，入口仲好惹味添。
雞絲隨便涼麵 :
見到餐牌上雞絲隨便涼麵，令我諗起，究竟整一味涼麵可以點樣隨便法呢? 好奇心底下決定叫黎試下啦。上菜後發現佢一d都唔隨便，仲好有心烹調添。雞絲加埋涼麵，配埋香滑既花生醬同埋青瓜絲，入口涼涼地，係呢d天氣食就真係最舒服啦。
巴蜀烤茄子 :
原條茄子開邊後加入巴蜀風味嘅香蒜同埋辣粉再拎去烤，上菜時香噴噴，入口相當惹味，可惜蓋過左茄子原有既味道，個人認為調味可輕手一點。
豬豬流沙包 :
呢味豬豬流沙包造型相當別緻，雖然包皮比想像中厚，但係奶黃味好香，入口都好鬆軟，不過如果d奶皇可以整得再流心一d就更加好喇。
花味冰粉 :
冰粉呢類甜品都係第一次試，賣相似桂花糕，味道甜甜地，加埋輕輕既桂花味，入口清新，食完咁重味既野食返碗就最適合不過啦。
總括黎講呢度既食物唔錯，環境亦都好舒適，睇得出係一間好用心經營既餐廳 ，有機會我一定會再來光顧。
地址: 天后興發街62-74號美城花園地下L舖
No comments:
Post a Comment