鮨芸館 (荔枝角)

香港係美食天堂，各式各樣既食物都食到，而日本菜算係最受歡迎既菜色之一。

荔枝角對於我黎講唔多就腳，平時都好少去，但係既然朋友介紹我試呢間位於D2 Place 既「鮨芸館」，就算遠d都無咩所謂啦。

「鮨芸館」讀「紙藝館」，設計別出心裁，以「鮨芸」配上「紙藝」，裝潢上運用既燈、牆、以至餐紙都融入日系紙藝風格，打造一個藝術化日本料理店！

門面同裝潢都相當精緻，店面半開放式設計令客人感覺闊落舒適，好有日式既感覺，除左有普通座位之外，仲可以揀吧枱同塌塌米添。

餐牌上有各式各樣既食物，好似刺身、壽司、卷物、燒物、揚物、串燒、煮物同食事等等，最特別既係迷你版既流水麵，係香港真係唔多地方可以食到。

依加正正係秋刀魚時令季節，魚肉特別肥美多子，鮨芸館就係呢個時候出左一系列既秋刀魚菜式，我地又點可以唔試下呢?

秋刀魚刺身 :
逐片逐片切出黎既秋刀魚刺身，連埋原條魚送上，加埋其他配料伴碟，賣相相當吸引，味道唔單止鮮甜，仲好肥美添。店員仲教我地要夾住蔥花同薑黎食，咁就可以消除魚腥味。

秋刀魚壽司 :
秋刀魚魚皮呈銀色而且反光，睇得出非常新鮮，魚肉中既細骨被廚師細心咁徹底挑起，入口除左有彈性之外，仲滿滿油香添。

秋刀魚丼跟味噌湯 :
飯面鋪滿秋刀魚刺身，伴以薑末及蔥花，食落感覺比秋刀魚壽司更刺激，除左秋刀魚既鮮甜外，薑末亦帶來輕微辣味，而伴碗既玉子燒亦煎得香甜鬆軟，配埋秋刀魚飯食味道好夾。

至於附送既麵豉湯，雖然迷你，但係味道相當唔錯。

汁燒紫蘇秋刀魚 :
紫蘇葉平時都無幾多機會食到，秋刀魚用紫蘇葉包住捲成捲狀，再用日式照燒汁慢火燒，紫蘇葉將秋刀魚的腥味除去，亦令秋刀魚更鮮甜，慢火燒之下魚肉外脆內軟，仲保留返肉汁，係食完刺身後食又有另一番風味。

鹽燒秋刀魚 :
外皮燒至香脆既鹽燒秋刀魚，肥而不膩，魚既肉同脂肪分配均勻，食既時候加上幾滴新鮮檸檬汁，令到魚既鮮味更加出。係海水既鹹味襯托下加上秋刀魚既鮮味，足以提升成道菜既層次。

味噌煮秋刀魚 :
賣相非常精緻，秋刀魚用日本味噌煮成，魚肉爽滑，味噌既味道滲入魚肉內，令秋刀魚更鮮甜，而味噌亦可以帶出秋刀魚油香味，令秋刀魚味道更有層次。

黑豚生薑燒配飯 :
相比起其他菜式，呢個飯份量真係相當多，黑豚肉切成薄片，咬落去肉質軟彈，肥瘦適中，吸收晒醬汁同生薑既精華後，入口甜得黎仲帶少少薑味，一d都唔乾，送飯一流。

流水彩虹素麵 :
平時睇旅遊節目，次次見到主持人食呢個流水冷麵都好羨慕，今次終於有機會試了。

微型流水冷麵機裝滿冰水，上面再放彩虹素麵同紫菜絲，開機後將一小注麵放入冰水度，就會不停咁循環轉，轉兩個圈後，筷子放在流水機擋著麵既流動，就可以好輕易夾起，放入加左芝麻，紫菜同蔥粒既冷麵汁度。

麵條入口非常柔軟，加埋冰凍既冷麵汁，入口清涼得黎仲好開胃添。

不過要提醒大家店內流水機既存貨量唔多，如果想食既話一定要事前預訂呀!

蜜桃青檸梳打 : 
食完飯後想再坐多陣，所以都叫左杯特飲。係眾多選擇下揀左蜜桃青檸梳打，入口有輕輕既蜜桃同青檸味，甜度適中，加埋杯底既生果粒相當有口感。

呢度食材新鮮，環境又好，食得又玩得，有機會一定要再黎過呀。

openrice link: https://www.openrice.com/zh/hongkong/r-%E9%AE%A8%E8%8A%B8%E9%A4%A8-%E8%8D%94%E6%9E%9D%E8%A7%92-%E6%97%A5%E6%9C%AC%E8%8F%9C-r473660

地址: 荔枝角長義街9號D2 Place 1期3樓301號舖