打邊爐算係我喜愛既菜式之一，因為可以慢慢坐慢慢食，係同朋友聚舊既好去處。
位於銅鑼灣京都廣場8樓既「漁火」，除左有一般火鍋配料之外，仲有刺身食，更重要既賣點，當然係用老火湯黎做湯底啦！
餐廳有大量醬油配料供應：辣椒、炸蒜、蒜蓉、芝麻、芫荽、蔥、沙茶醬、花生醬、麻油，真係講得出既都有架。
蕃茄薯仔粟米湯 :
坐低後，第一件事當然係揀左湯底先啦，其實湯底都算係火鍋既主角，一個靚既湯底，淥出黎既野食都好味d。喜歡食蕃茄既我，毫不猶豫地揀左蕃茄薯仔粟米湯，係未放任何食物落去淥之前，忍唔住先試一口，入口味道清甜，飲得出無咩味精。
雜錦刺身 :
雜錦刺身賣相震撼，非常吸引，真係令人忍唔住「相機食先」。拼盤分別係三文魚，北寄貝，帶子同油甘魚，各樣刺身都厚切，三文魚同油甘魚油脂分佈平均，帶子入口都好鮮甜，以$288呢個價錢黎講算係性價比高。
自家帶子餃 :
帶子餃內包住大大小小既帶子粒，非常飽滿，餃皮夠薄之餘質感仲好紮實，味道唔錯。
手打蝦丸 :
手打蝦丸即叫即打，粒粒大細平均，入口新鮮好味而且彈牙。不過就咁放係隻普通既碟上有點兒單調，建議可以考慮用有分格既碟，咁既話賣相會更加吸引。
走地清遠滑雞件 :
雞件吸左湯底既精華後非常入味，入口仲好滑添，令人一件一件咁食到停唔到口。
響鈴 :
即叫即炸既響鈴，輕輕放入湯內淥過後，外軟內脆，吸收左湯底既精華後真係格外好味。
鮮滑牛肉 :
牛肉肉質鮮嫩，牛味濃郁，口感唔錯，淥左一段時間都唔會過韌，對於呢個價錢黎講算係性價比高。
北海道蟹柳 :
蟹柳一向都係我打邊爐既至愛，貪佢淥一陣就有得食，呢度既蟹柳夠甜，唔會淥一淥就散晒，應該係貴價貨。
娃娃菜 :
淥左咁多野食之後，湯底已經好入味，係呢個時候落菜就最適合不過啦。
呢隻環境乾淨企理，食材新鮮，湯底又無咩味精，最重要既係服務非常之好，店員又會不停幫我地收碟，令到我地張檯唔會咁逼，雖然價錢唔平，但係間唔中黎食下，都唔錯呀。
地址: 銅鑼灣駱克道491-499號京都廣場8樓
No comments:
Post a Comment