My Day (尖沙咀)

細細個時既我真係超鍾意食自助餐，但係大大下就發覺，食自助餐真係有點兒貼錢買難受，又唔係平，又要捧住個肚離開，仲要飽到未來十二小時都唔想食野，幾日都無咩胃口，真係唔知為咩！

近年香港唔少餐廳都推出半自助餐，所謂既半自助餐，就係沙律吧、甜品同湯都係自助，main course就自己揀。

餐廳位於美麗華商場食四方6樓，地點旺中帶靜，餐廳裝修得好靚，平時係用黎做婚宴場地，無人book既時候先會做半自助晚餐。

半自助晚餐價錢由$268起，包沙律吧、頭盤、餐湯、海鮮拼盤、主菜、甜品拼盤同埋餐飲。

沙律吧選擇好多，有薯仔沙律、羅馬生菜、生菜、火腿、粟米、蕃茄、煙肉粒、水果等等任君選擇，醬汁方面都有成3款揀，全部野我都好鍾意。

餐湯方面係南瓜湯，入口非常creamy 。

海鮮拼盤有龍蝦、海蝦、翡翠螺、松葉蟹腳同青口，賣相相當吸引，全部都好新鮮，龍蝦大隻得黎肉質仲非常彈牙，亦都好重海水味，海蝦亦都啖啖肉，認真唔錯。

食完沙律同海鮮，飲完湯後，其實都已經飽飽地，係呢個時候，主菜終於出場喇。

低溫慢煮咖喱春雞 :

開頭以為係原隻春雞配咖喱汁，上檯時先發覺係四分一雞配白飯。春雞煮得夠嫩滑，咬落一d都唔韌，咖喱微辣且非常香口，值得一讚既係餐廳另外用一個小樽裝咖喱汁，咁就唔怕唔夠汁撈飯啦。

墨魚仔蕃茄乾扁意粉 :

扁意粉上面舖滿墨魚仔，上檯時香味十足，墨魚仔爽口唔韌，扁意粉帶輕微蒜味，配上蕃茄乾及車厘茄，食落非常惹味。份量雖然唔多，但對於食左唔少沙律既我岩岩好，如果太大份的話，就會食唔落接下來既"主菜"喇。

甜品拼盤: 

甜品對於唔少女仔黎講先至係主菜，係開飯網見到其他網友黎食時甜品都仲係自助，起初都有點兒失望架，因為我食甜品係用第二個胃，就算正餐有幾飽都好，甜品都至少會食到少少。雖然今日既甜品唔係自助，但係呢個甜品拼盤真係非常吸引，簡直係呃Like之選，上檯時真係令人「嘩」一聲，真係唔「相機食先」都唔得呀。甜品賣相非常精緻，件件都好的骰，款式都有好多，有焦糖燉蛋啦、曲奇、啫喱糖、抹茶蛋糕、布朗尼、牛奶布丁等等，全部都好好食，真係見到個拼盤都開心呀。

呢度環境寧靜，食物質素又相當高，最令人開心既就係佢個甜品拼盤，食完之後真係令我開心左成晚。雖然整體黎講份量真係有d多，但係如果餐廳可以再次推出無跟main course 既自助沙律/甜品吧，咁就好喇。

openrice link: https://www.openrice.com/zh/hongkong/r-my-day-%E5%B0%96%E6%B2%99%E5%92%80-%E5%A4%9A%E5%9C%8B%E8%8F%9C-%E8%87%AA%E5%8A%A9%E9%A4%90-r511525

地址: 尖沙咀彌敦道132號美麗華廣場一期食四方6樓601號舖