喜愛明太子既我，最近發現呢間位於銅鑼灣軒尼詩道專食明太子料理既「鱈卵屋」，原來係日本係非常受歡迎架，聽朋友講如果放工時間walk in 既話一定有排等，所以都一早book左檯。
餐廳近門口既位置有好多明太子產品賣, 全部都係自家製，部分仲有埋recipe等你返屋企可以跟住整添。
鱈卵三色刺身拼盤 :
前菜我地揀左鱈卵三色刺身拼盤。三色刺身分別三文魚明太、辣味沙律吞拿魚同埋博多芝麻醬油甘魚，分別載係唔同既兜度，的的骰骰，幾可愛。
三文魚明太 : 肥美既三文魚切成條狀再加入明太子，三文魚油脂分佈平均，入口鹹鹹地，食落好開胃，令人食到停唔到口。
辣味沙律吞拿魚 : 味道偏腥偏重既吞拿魚切粒後再加入辣味醬汁，味道好特別。
博多芝麻醬油甘魚 : 油甘魚配上博多芝麻醬，呢個配搭都係第一次，感覺一D都唔似刺身，而係小食。
鬆軟明太子上灌湯蛋卷 :
韓式蛋卷就食得多，但係日式既就真係唔多機會試，呢份明太子上灌湯蛋卷由多層加入左上湯同蔥花既蛋皮捲成，外表呈金黃色，蔥花若忍若現，蛋皮層次分明，熟既程度剛剛好，所以入口非常鬆軟，水份十足。除此之外，明太子份量亦都好多，食既時候要小心d，免失儀態。
炸流心芝士球 :
賣相似豆卜既芝士球，入口時芝士會由中間滲出，點埋明太子醬都唔會蓋過芝士既味道，食法非常創新。
炸竹輪魚蛋明太子 :
係竹輪內釀入明太子，再沾上混了海苔粉既炸漿炸成，入口脆得黎又唔油，唔錯。
唔講都唔知原來明太子都可以有咁多唔同既配搭，可以整到唔同既菜式，真係大開眼界呀。
地址: 銅鑼灣軒尼詩道499號永光商業大廈14樓
No comments:
Post a Comment