Dazzling Cafe (尖沙咀)

係工作上能夠識到好朋友，真係可遇而不可求，係離職後仲能夠保持聯絡，真係難能可貴。是日星期五，難得同舊同事聚舊，都想搵個地方可以坐耐d，食好野，傾下大家既近況。

朋友極力介紹呢間餐廳，我地放工後七點幾黎到，已經大排長龍，由於無得拎飛，唯有係門口排隊，由於係繁忙時間，我地足足等左個幾鐘先至可以入座。

由於餐廳規定每人要叫一杯飲品，所以平時好少另叫餐飲既我都叫左杯珍珠奶茶。

珍珠加入蜂蜜熬煮後加入香濃既奶茶度，帶蜂蜜香氣之餘又唔會過甜。

辣味雞肉意大利麵: 

意粉爽口彈牙，帶微辣，炒得有鑊氣同時間醬汁亦都收得好乾，配菜除左有雞肉之外仲有西蘭花、香菇同車厘茄，令到整體顏色鮮艷，賣相吸引。

和風BBQ 豬排三文治:  

雖然等候需時，但係呢份三文治真係相當吸引，一份有四件，鬆軟既多士內夾入酥脆既豬排同埋少量既芝士，口感一流，豬排夠厚，炸得香脆得黎仲一d都唔油，芝士味亦都唔重，適合唔多好芝士既我，伴碟既薯條亦都好吸引，真係好好味，可惜眼闊肚窄既我地真係食唔落唔多，又唔想浪費美食，唯有打包。

草莓蜜糖吐司:  

雖然已經食到幾飽下，但係幾時都話，女仔既胃係有特別間格，就算正餐食到幾飽，甜品點都會食得落。呢份草莓蜜糖吐司，吐司製作需時，份量十足，雖然知道無可能食得晒但係硬係唔叫唔安落。

吐司上面放左大量既士多啤梨、雪糕同埋果醬，只係賣相已經滿分，上檯時真係好難唔「相機食先」。

厚厚既吐司切開後裡面仲有小吐司，入口非常鬆脆，點住雪糕同果醬，加埋士多啤梨一齊食，真係好好味，可惜澱粉質太高，好難食得多，建議多d人一齊share食，每人食少少已經夠架喇。

呢度既食物無論飲品、主菜定甜品都非常之高水準，雖然要排成個鐘頭隊先食到，但都係值得既。不過份量真係比想像中既多，下次要叫多d人一齊黎，再試多d唔同既野食呀。

openrice link: https://www.openrice.com/zh/hongkong/r-dazzling-cafe-%E5%B0%96%E6%B2%99%E5%92%80-%E5%8F%B0%E7%81%A3%E8%8F%9C-r173559

地址: 尖沙咀彌敦道100號The ONE 3樓22號舖