El Cerdo (灣仔)

一聽到西班牙菜你會諗起d咩？西班牙海鮮飯？西班牙油條？

一向喜歡食西餐既我，最近從朋友既面書上發現呢間已經有兩間分店既El Cerdo。

位於灣仔既El Cerdo，主打西班牙菜，由灣仔地鐵站C出口行過去都只係幾步路，非常方便。

餐廳廚房為開放式，客人可以睇到廚師烹調既過程，裝潢方面亦都相當時尚，樓底非常高，近天花位置用左唔同顏色既圖形黎設計，光線亦都好充足，帶俾客人好舒服既感覺。

餐牌主要係英文同西班牙文，如果有需要既可以另外叫店員俾中英對照既餐牌你。餐牌上既選擇唔算多，食物款式分別有The classics，of the land， Iberian cured meat and cheese，of  the sea，of  the garden同something sweet，大多數都係西班牙tapas，份量比較少，但係正正因為咁，我地可以試多d唔同既食物。

Ham Croquettes 炸黑毛豬火腿球 :

呢味西班牙丸子表面炸得好脆，內裡充滿住濃厚既白汁，除左有風乾既黑毛豬火腿粒之外，仲有非常滑既薯蓉，入口非常creamy，唯一美中不足既係芝士味過重，唔好芝士既我認為可以落少D。

Cristal Bread/Tomato 鮮蕃茄蓉焗法包 :

餐廳將自家製既蕃茄蓉放上迷你法包上，蕃茄蓉凍凍地，帶少少蕃茄汁，入口鹹鹹地，一份共有四件，每件細細塊，非常精緻，亦都好好味。

Pork Belly/Quince Aioli 脆皮豬腩肉配蜂蜜蛋黃醬 :

豬腩肉燒得皮脆肉嫩，豬皮，脂肪同豬肉亦都層次分明，入口唔算太油膩，感覺有點兒似中式燒肉，配埋蜂蜜蛋黃醬，味道酸酸甜甜，入口鬆軟，整體配搭唔錯。

Crispy Squid/Garlic/Chilli/Lemon Aioli 鮮炸魷魚配蒜蓉檸檬汁 :

炸魷魚圈配上椒鹽，上檯時熱辣辣而且香噴噴，點埋自家製既蒜蓉檸檬汁簡直係絕配。

Marinated White Anchovies 檸檬汁醃白隄魚柳 :

賣相似沙甸魚既白隄魚柳，賣相精緻，其實都幾可愛，淋上檸檬汁後，入口酸酸地，真係醒神開胃。

Spanish omelette of potatoes/eggs/onions 傳統洋蔥薯仔西班牙奄列 :

圓型而厚身既西班牙奄列，賣相有d似大阪燒，呢味西班牙奄列係用蛋包住薯仔粒同埋洋蔥整成，厚身得黎外層脆脆地，味道似薯餅多過西式奄列，切開之後，裡面比較濕潤，薯仔亦都偏淋，非常有口感。

Sizzlings Prawns/ Garlic/Chilli 鐵板燒蒜蓉辣椒炒大蝦 :

上檯時熱辣辣之餘仲有沙沙聲，一上菜就聞到一陣陣既蒜香味。大蝦肉質鮮嫩，爽口鮮甜，蝦下面既醬汁仍然滾燙，醬汁帶香蒜味，帶微辣，非常惹味，不過如果可以整得再辣少少就更加迎合到喜歡食辣野既我啦。

Churros with nutella 香脆肉桂條配榛子朱古力醬 :

香脆肉桂條對於我黎講係西班牙餐廳必叫既食物之一，自從一年多前試過之後就對佢念念不忘，熱辣辣既churros上面灑上 icing sugar，入口外脆內軟，帶有淡淡既玉桂味，配埋香滑既nutella朱古力醬，真係令人食到停唔到口。

呢度環境同食物都算唔錯，雖然每樣食物價錢算平，但係賣相比較的骰，所以兩個人都要叫返十樣八樣野食先夠飽，平均消費都要200幾蚊。不過餐廳無強制加一服務費，客人可因應店員既服務而自行決定俾幾錢貼士既。

Openrice link:  https://www.openrice.com/zh/hongkong/r-el-cerdo-%E7%81%A3%E4%BB%94-%E8%A5%BF%E7%8F%AD%E7%89%99%E8%8F%9C-r535818 

地址:  灣仔駱克道114號地鋪