Centre de Vin (觀塘)

是日星期一，唔多唔少都有D Monday Blue，好唔容易先等到放工，一於同朋友去食好野啦。

呢間位於觀塘既Centre de Vin，除左係意式餐廳之外，仲係葡萄酒專賣店，唔單止有酒飲，仲有品酒班上，真係適合鍾意飲酒既朋友。除此之外，呢度既環境非常闊落，裝潢亦都算簡單，帶俾人一種好舒適既感覺。

雖然餐廳係位於觀塘區，但係如果搭地鐵既話係牛頭角地鐵站出去會近d。由 A2 出口步行約6分鐘，行行人天橋過創紀之城，鴻圖中心就位於美亞後面，舊巴士廠旁。

由於我地唔太好酒，所以晚餐都係focus係食物多d。睇過set menu，雖然係抵食，但始終選擇有限制，所以我地都係prefer散叫。

首先我地一人叫左一個湯，分別係蘑菇湯同埋甘筍忌廉湯。每個湯都會配一片麵包。

蘑菇湯 :
個湯入口香滑而且濃郁，稀稠度剛剛好，但味道可以再濃啲，不過個人認為如果菇粒無打到咁碎，入口會更加有咬口，咁就更加好。
 

是日餐湯 :
是日餐湯係甘筍忌廉湯，賣相呈橙黃色，入口creamy，味道鮮甜，唔錯。 

法式燒春雞配炒雜菜 :
賣相相當吸引既燒春雞，火喉剛剛好，表面烤得微脆，香得黎又唔會太乾，入口都幾嫩滑，伴碟有炒薯仔片、洋蔥同車厘茄，都幾惹味。

黑松露野菌意大利飯 :
另一個主菜係黑松露野菌意大利飯，材料有好多菇，帶有香濃既黑松露味，意大利飯煮得微硬，好有意式傳統風味，吸收晒黑松露醬汁之後真係幾好味，令人食到停唔到口。唯一美中不足既係賣相比較平凡，建議多加少少色彩，咁就完美啦。

呢度食物唔錯，環境舒適，檯同檯之間亦都有好多空間，極有私隱度，係約會或見客既好地方。 

openrice link: https://www.openrice.com/zh/hongkong/r-centre-de-vin-%E8%A7%80%E5%A1%98-%E8%A5%BF%E5%BC%8F-r485842

地址: 觀塘巧明街94-96號鴻圖中心9樓