七福神和食亭 (佐敦)

黎過呢間餐廳都好多次架喇，好鍾意呢度食物款式多，而且價錢又唔貴，又可以坐得好耐。

和風珍味拼盤: 

呢味係我每一次黎都要叫既菜，拼盤有齊我鍾意食既日式前菜，有八爪魚，中華沙律同埋螺肉，份量也幾多，全部既味道都幾好， 螺肉就帶有少少辣味，中華沙律食落都好爽，令人越食越開胃。

炭火燒泡菜鷄翼: 

一客三隻, 鷄翼去骨後釀滿鷄肉及泡菜碎再拎去煎，外層香脆香口，內裡嫩香多汁，味道一D都唔辣。

手卷叫左蟹籽手卷同埋海膽手卷，手卷D飯夾得好實，海膽又唔會好大陣腥味，好合我口味。

壽司分別叫左蟹籽，蟹棒，帶子同埋吞拿魚，蟹籽食落唔腥，亦都夠爽口，紫菜都唔會淋晒。蟹棒一向係我最愛，夾起時唔會散晒。帶子鮮甜，一d腥味都冇。吞拿魚夠新鮮唔腥。

士多啤梨煙三文魚果醋沙律:
沙律份量極多，賣相都唔錯，不過士多啤梨份量偏少，多一D賣相會更加好。煙三文魚配上沙律菜同埋士多啤梨片食落感覺好清新，配埋微酸帶甜既柚子沙律汁口感清新，真係好開胃。

串燒5品食盒:
5品食盒即係5款串燒，有雞翼，蔥燒雞肉，冬菇，小青椒同豬頸肉。雞翼皮燒得脆，燒完後無咁油，但又唔會好乾。

蔥燒雞肉肉嫩，蔥味唔太強，唔鍾意食蔥既我都覺得好味。冬菇燒完都唔會太乾，菇味濃郁。

小青椒唔太辣，有d似煎釀三寶咁。豬頸肉食落爽口有肉汁，好味道。

埋單每人都要180蚊，其實同放題差唔多，但係人大左，真係無細個時咁食得，所以都係prefer 揀個地方D野好食D同好坐D好過。

openrice link: https://www.openrice.com/zh/hongkong/r-%E4%B8%83%E7%A6%8F%E7%A5%9E%E5%92%8C%E9%A3%9F%E4%BA%AD-%E4%BD%90%E6%95%A6-%E6%97%A5%E6%9C%AC%E8%8F%9C-%E6%8B%89%E9%BA%B5-r452625

地址: 佐敦彌敦道311-313號1樓