講開慶祝生日, 其實細個讀書時真係無咩機會架, 事關小妹十一月生日, 好多時都正值考試時間, 生日唔係溫書就係考試。
今年嘅生日係上班日, 好好彩地男朋友黎左接我放工，帶左我黎位於尖沙咀永安廣場嘅Elia。餐廳座位有分室內同室外, 怕煙味嘅我地當然揀左室內嘅座位啦。
餐廳內燈光柔和，充滿異國風情，令人感覺好舒服。
La Pinta /Tu Sonrisa :
首先就係叫左兩杯飲品，唔飲酒嘅我地叫左mocktail。
La Pinta 主要係以蝶豆花，檸檬汁，蘋果，熱情果同梳打水溝成，而Tu Sonrisa就以芒果，棉花糖糖漿，薄荷，青檸汁同橙汁溝成，整體黎講份量比想像中少，不過果汁味濃而且入口唔太甜，幾開胃。
Spicy Gambas:
頭盤我地叫左Spicy Gambas。新鮮嘅蝦加入左香料炒過後味道相當香濃帶點微辣，入口爽口彈牙，令人越食越開胃，可惜份量唔多，兩個人好快就食完啦。
Chicken Paella:
Paella 可以揀雞或者蝦，咁既然頭盤揀左蝦，咁主菜就當然唔想揀返一樣，所以我地就揀左要雞啦。
西班牙飯加入雞肉，彩椒同秘製醬汁炒過後雖然比想像中無咁乾身，但係勝在炒得夠香同埋夠熱，值得一讚。
Arabiata sauce spaghetti:
Arabiata sauce其實即係辣蕃茄醬，用黎炒意粉就真係幾惹味。呢味意粉炒起黎非常多汁，辣味剛剛好，唯一美中不足嘅係落左芝士粉，唔食芝士嘅我覺得有點兒可惜，如果可以好似部分餐廳叫侍應們另上嘅就好啦。
食完之後黎左一個大「驚喜」。雖然生日飯永遠都係以一份有寫生日快樂嘅甜品黎做結尾，但係今次呢支大蠟燭真係一個超級大驚喜，事關噴火程度真係相當壯觀。
呢份甜品係churros, 亦都係我喜愛嘅西班牙甜品之一。即叫即整嘅西班牙油炸鬼，外層香脆而內層鬆軟，點上濃而不甜嘅朱古力醬，真係令人回味，亦都帶俾我一個難忘嘅生日。
Openrice link: https://www.openrice.com/zh/hongkong/r-elia-尖沙咀-西班牙菜-r571562
地址：尖沙咀麼地道62號永安廣場地下1號舖
No comments:
Post a Comment