咖啡灣(荃灣)

今日見天氣好，就想去城門水塘行山，咁當然要食飽飽先出發啦，咁岩係小巴站附近見到呢間餐廳好靚，不如就試下啦。餐廳英文名叫 Cafe Swan，所以櫥窗都有隻天鵝黎襯托住，非常吸引。餐廳裡面既裝潢佈置亦都好夢幻，仲有個用LEGO砌成既摩天輪，加埋LED燈，真係好有童話既感覺，令人見到都好開心。

坐低之後店員就過黎俾餐牌我地，順便介紹下餐廳有咩招牌菜。

既然店員向我地介紹呢味軟殼蟹卡邦尼蛋汁意大利麵，就一於試下啦。一上菜時，軟殼蟹真係好香，成隻酥炸軟殼蟹放係卡邦尼意粉上面，賣相好吸引，軟殼蟹入口外脆內軟，加埋蛋汁香濃既卡邦尼意大利麵真係令人越食越開胃。

另一份我地揀左All day breakfast，非常豐富，有煙三文魚，多士，火腿，煙肉，炒蘑菇，腸仔，薯餅同埋黑松露炒蛋。煙三文魚捲埋放係中間好靚，多士係用丹麥酥整成，有別於一般餐廳既all day breakfast，腸仔係用脆皮腸，足足有4條咁多，而黑松露炒蛋炒得香滑，可惜火腿煎得比較油，而炒蘑菇亦都比較乾，有改善空間。

加10蚊仲有一杯熱latte，大大杯，仲有埋隻天鵝拉花，真係靚到唔捨得飲呀。

整體黎講呢到環境同食物都幾好，埋單每人都係120蚊，坐得舒舒服服，係傾計同影相既好地方，而餐牌入面仲有好多甜品，下次真係要試下呀。

openrice link: https://www.openrice.com/zh/hongkong/r-%E5%92%96%E5%95%A1%E7%81%A3-%E8%8D%83%E7%81%A3-%E8%A5%BF%E5%BC%8F-%E6%BC%A2%E5%A0%A1%E5%8C%85-r512406

地址: 荃灣眾安街68號千色匯2期地下G30-G33號鋪