餐廳位於商業大廈裡面，牆壁掛有主角既劇照，亦都有一D造形眼鏡，假髮，面具，頭箍等等俾大家試玩，同時提醒大家玩完記得擺回原處.
每枱上都有塊木牌，一面寫上「唔該」，另一邊寫上"Beer pls" ，每次點餐或叫店員時只需要舉起個牌，店員就會走過黎幫你架啦。除此之外，每枱都有Running Man 裡面其中一種玩具既迷你版，未齊人時可玩下輕鬆下，店員佢地亦都著左背脊有名牌既運動衫，D 名牌仲係running man 裡面可以撕貼果隻，好得意架。
前菜:
前菜有3款，分別係粟米，泡菜，同埋白蘿蔔，粟米撈左D似係沙律醬既醬汁，食落好開胃，至於泡菜都幾辣下，食落都幾過癮，食完想再添仲可以叫職員添加架。
辣炒雞+ 韓國傳統煎餅:鐵鍋既中間係辣炒雞，而側邊圍住既係韓國傳統煎餅。辣炒雞係用泡菜再加少少香料炒成既，雞肉好滑，大大件，食落都相當辣，亦都好惹味。至於側邊既韓國傳統煎餅都有好多款，有翠玉瓜， 茄子，蟹柳同埋菇，全部都係沾少少蛋汁再加麵粉煎成既，除此之外仲有3件韓國蛋卷，蛋卷入面有好多層，一咬落去好正，玉子外皮軟綿綿，口感好特別。
甜辣醬紫菜卷+ 韓式鍋貼:
韓式鍋貼既餡料出奇地唔係泡菜，反而係普通既菜肉餡。至於紫菜卷就相對特別，似係用紫菜包住粉絲之類既野炸到脆身，入邊既材料同紫菜好夾，食嘅時候好香脆，好似春卷咁，之後仲係上面淋上酸酸甜甜既醬，幾好味。伴碟既仲有沙律，食完D肥膩野再食返D沙律感覺真係幾清新。
地址: 旺角彌敦道726號10樓
No comments:
Post a Comment