呢到裝修好特別，坐得都幾舒服，感覺真係唔錯!
我地2個人叫左一個套餐，一個Pizza同埋一個沙律。套餐方面叫左焗金文畢芝士釀海鮮三文魚扒，配湯，黑松露意大利雲吞同埋餐飲。Pizza方面係炭燒雞肉牛油果薄餅，而沙律叫左煙三文魚凱撒沙律。
店員先送上餐包，個包熱辣辣，亦都好脆口，如果可以俾大塊D就更加好啦。
是日餐湯- 蘋果忌廉湯: 蘋果味偏淡，但係勝在忌廉湯底好滑，配埋熱辣辣既麵包食真係幾好味。
黑松露意大利雲吞: 意大利雲吞好香好滑，醬汁有香濃既奶味，雲吞皮夠薄而且好有咬感，味道一流，做法都幾正宗，雲吞上仲有炸過既脆口雲吞條，幾特別。
煙三文魚凱撒沙律: 沙律比想像中大份，煙三文魚都好多，沙律仲配左黑醋汁，酸酸地，配搭好清新，食落都幾開胃。
炭燒雞肉牛油果薄餅: 薄餅薄身而脆口，上面放了少少茄醬，炭燒雞肉帶有日式風味，加入牛油果同薄餅融合之後味道好特別，無肥膩既感覺，薄餅上面仲配有沙律菜，味道一絕。
焗金文畢芝士釀海鮮三文魚扒: 三文魚扒口感好特別，一D都唔鞋口，上面淋上用海鮮同芝士整食既醬汁去焗，又香又鮮味，旁邊用紫薯薯蓉伴碟，睇得出大廚好有心思。
餐飲係熱咖啡，咖啡味好香，上檯時都好夠熱，如果可以加個拉花就更加好啦。
甜品係藍莓芝士蛋糕，蛋糕軟綿綿，又夠濕潤，芝士味唔重，最適合我呢D唔好芝士既人。
埋單一人都要200幾蚊，價錢一般，但係坐得舒服，又同朋友傾到計，都算唔錯架啦。
openrice link: http://www.openrice.com/zh/hongkong/r-deer-kitchen-%E8%A7%80%E5%A1%98-%E8%A5%BF%E5%BC%8F-%E6%B2%99%E5%BE%8B-r481449
地址: 觀塘巧明街119-121號年運工業大厦1樓B3
No comments:
Post a Comment