由於一早訂左檯，所以黎到唔洗等位就可以入座。
等左大約10分鐘之後，期待已久嘅tea set終於到啦，有別於一般西式tea set 用到嘅多層架，今日嘅食物係用木箱黎上菜，賣相相當精緻，睇得出廚師係非常用心嘅，我地亦都忍唔住「相機食先」。
箱內仲裝左音樂盒，播住澎湃嘅海浪聲，令我哋猶如置身於夏日嘅沙灘內。
呢個tea set 嘅鹹點包括：
迷你牛油芝士漢堡
牛油果蝦多士卷
菠菜忌廉伴烤雞柳
巴馬風乾火腿蜜瓜紅菜頭撻
惹味釀蟹蓋
而甜點就有：
紅莓慕絲甜筒
蘭香子鮮雜果布甸
香橙果凍
柚子吉士撻
車厘子帽子蛋糕
青檸英式鬆餅配鮮忌廉及蜜糖果醬
迷你牛油芝士漢堡:
冇食午餐嘅我哋，下午茶點都要有返少少澱粉質，呢個漢堡賣相非常吸引，麵包烤過後入口脆身，牛肉入口亦都非常juicy，配上輕輕嘅芝士味，味道唔錯。
牛油果蝦多士卷:
蝦多士就食得多,配牛油果就唔係太常見,牛油果微甜嘅味道同蝦多士唔單止夠夾,而且可以減低整體油膩感,唔會有飽飽滯滯嘅感覺。
菠菜忌廉伴烤雞柳:
呢個鹹點賣相有少少似甜品，菠菜加入其他材料打成蓉之後上面再加入忌廉，上面再放上雞柳，做法相當新穎。
巴馬風乾火腿蜜瓜紅菜頭撻：
用紅菜頭製成既威化撻，賣相似威化筒，顏色帶粉紅，入面再放入香甜嘅蜜瓜同埋鹹香嘅巴馬風乾火腿，咬落香脆，入口甜中帶鹹，非常特別。
惹味釀蟹蓋:
蟹蓋加入蔬菜釀過後再焗，入口無油膩感，值得一讚。
食完鹹點後，就係時間食甜點啦。
紅莓慕絲甜筒:
做法具有創意，迷你雪糕筒內紅莓慕絲，入口香脆可口，味道非常夾。
蘭香子鮮雜果布甸:
蘭香子加入雜果同埋大菜整成嘅甜品， 賣相好似果凍，入口唔會太甜，非常清新，夏日炎炎呢啲日子食，真係可以消暑。
香橙果凍:
橙一開二之後挑走橙肉用黎盛載啫喱，雪到凝固後再切開，賣相真係好似切開咗嘅橙，做法非常有創意。
柚子吉士撻:
香脆嘅撻皮上加入吉士，上面再放上柚子，入口非常清新，好好味，值得一讚。
車厘子帽子蛋糕:
濕潤嘅牛油蛋榚上加上吉士醬，用黎黏住車厘子，賣相都相當吸引，整體配搭亦都唔錯。
青檸英式鬆餅配鮮忌廉及蜜糖果醬:
鬆餅係西式下午茶中算係不可缺少嘅一樣食物，青檸味嘅鬆餅都係第一次試，味道出奇地出，同時帶輕輕嘅牛油味，上檯時仲係暖暖地，配上鮮忌廉同蜜糖果醬食，真係充滿英式風味。
飲品包兩杯飲品，我地選擇左加$15 upgrade 去招牌水果茶同埋cappaucino。
水果茶充滿水果味，入口香甜，帶輕輕嘅茶味，餐廳仲好細心地用火坐住我哋個茶壺，坐耐啲都唔怕d茶會變凍。
至於cappuccino 咖啡味道香濃, 亦都為我地今日近乎完美嘅下午茶劃上句號。
兩個人坐左成個下午，食咗咁多野，又嘆茶又嘆咖啡，每人都係＄150左右，真係可以消除一周嘅疲勞呀。
openrice link: https://www.openrice.com/zh/hongkong/r-espuma-尖沙咀-多國菜-甜品-糖水-r175038
地址：尖沙咀厚福街8號H8 2樓
No comments:
Post a Comment