位於銅鑼灣謝斐道嘅「鉄人旨花」，周圍都係餐廳，但係點都估唔到原來有地方食到正宗嘅日本菜。
晚市除咗可以揀單點之外，仲可以揀omakase或者鐵板燒，價錢相若，不過由於我地想邊近距離欣賞廚師手藝邊享用晚餐，我地選擇咗鐵板，亦都因為咁，我們獲安排坐係半圓形嘅鐵板燒區。
鐵板餐共有四個選擇，全部都係二人套餐，價錢由$2088至$2588不等，而我地揀嘅係價錢比較便宜嘅「伊勢海老鐵板燒」。
「伊勢海老鐵板燒」合共七道菜，而最先上檯嘅當然係手工前菜啦。
手作前菜分別為芥辣小墨魚同埋和風沙律。
小墨魚加入芥辣食都係第一次，味道出奇地夾，入口非常醒神，加埋材料豐富嘅和風沙律，真係非常開胃。
汁煮東星班 :
厚切東星斑肉質結實，入口嫩滑，配埋加過醬汁炒起嘅洋蔥，真正能夠帶出東星斑嘅鮮味。
海膽汁煮龍蝦 :
係呢度不得不提嘅係龍蝦真係又大隻又生猛，到煮果刻都仲未死。廚師先係我地面前將龍蝦起肉，係煮到半熟時再為我地準備海膽汁。
龍蝦肉每人分得比想像中多，火喉剛剛好，入口非常彈牙，醬汁濃度剛剛好，加少少檸檬汁食，味道非常鮮甜，一d腥味都無，非常好味。
熊本縣產A5和王牛 :
平時唔食牛嘅我，遇到有特色嘅牛，點都會試下嘅。今日試嘅和牛花紋豐富，五成熟嘅佢，不但肉質鮮嫩唔多筋，而且入口多汁。配菜方面有蕃薯、大啡菇同露荀，全部都好清甜。
和牛炒飯（日本產米） :
廚師首先煎香和牛，再用佢嘅油份黎炒飯，稍後再加入雞蛋同埋蔥，呢個配搭令到整體色澤豐富，賣相都相當吸引。用咗日本米炒成嘅飯，入口煙韌，非常爽口。
去到呢個時候，廚師就同我地暫別喇，因為接下來嘅菜式唔係由佢準備，而係由廚房處理嘅。
清酒煮蜆 :
蜆肉大隻飽滿，用清酒煮過後，入口相當鮮甜，好可惜每人只有兩隻，如果可以食多少少就更加好啦。
甜品 :
是日甜品係櫻花杏仁布甸或柚子雜果啫喱，而我地每人都各自揀咗一款。
杏仁布甸味道偏濃，入口嫩滑，無肥膩感，至於柚子雜果啫喱味道亦都相當清新，為我地今晚嘅晚餐劃上完美嘅句號。
成餐飯前後食咗個幾兩個鐘，但係一邊食一邊傾計，時間真係過得好快。呢度咁好嘅環境，加埋高質嘅服務同埋食物，真係適合情人黎慶祝各類型嘅紀念日呀。
地址：銅鑼灣謝斐道477-481號肇明大廈2樓
No comments:
Post a Comment