由於同行朋友唔太喜歡食魚，我地揀咗配料選擇較多嘅香鍋。
香鍋辣度有四個選擇，分別係香辣、麻辣、孜然同埋醬香味。我地揀咗麻辣，而配料方面我地揀咗肥牛、豬耳、雞翼、貢丸、香菇同埋豆卜，當然唔少得大量辣椒啦。
香鍋上菜時熱辣辣，賣相吸引，入口微辣，配埋飯食都幾開胃，不過喜歡食辣嘅我認為可以再辣多少少，咁樣入口就會更加惹味。
配料方面，值得一讚嘅係廚師將雞翼一開二，方便客人進食，除此之外，豬耳亦都切至幼身，入口非常爽，口感同味道都非常豐富。
除咗香鍋之外，我地都叫咗個「小龍坎口水雞」。啖啖肉嘅雞件，肉質非常嫩滑，亦都唔算多脂肪。雞肉吸收晒秘製麻辣醬汁後，聞落好香，入口又麻又辣，非常好味，令人一件接一件咁食。
Somersby Crush原味／Somersby Crush提子味 :
食d味道咁濃嘅野，點都要飲返d凍野解下渴。近年真係好興呢d賣相精緻，倒轉酒樽插嘅飲品，見呢度價錢非常超值，都想試下。
呢杯特飲只係賣相已經夠吸引，底層有d類似梳打水+檸檬／提子沙冰，再插入一枝原裝嘅Somersby Cider，大大杯，入口酸酸甜甜，酒味唔重，一個人真係未必飲得晒。
最吸引我地嘅係飲品入面有一粒會閃嘅冰，真係好欣賞廚房職員嘅心思。
甜品 :
食完飯後，店員就為我地送上紅糖冰粉同埋水果做飯後果喇。其實冰粉都算係傳統四川甜品之一，賣相有少少似桂花糕，味道甜甜地，入口清新，食完辣嘢食返碗真係好舒服。
呢度嘅嘢食都算唔錯，下次多d人黎時候等我試埋烤魚同埋雞煲先。
地址：銅鑼灣記利佐治街1號金百利廣場8樓R1號舖
No comments:
Post a Comment