The Grill Room (銅鑼灣)

香港地無咩地方真係可以食到傳統少少既西餐，不久之前同事向我介紹呢間The Grill Room，今日放工就同朋友一齊過黎呢度試下啦。

呢度幾乎每一日都有唔同既優惠，例如星期一就有買一送一啦，星期二Ribs同薯條都係任食，星期三又有啤酒任飲等等。

Menu 方面我地有得揀Set 或者a la carte，有選擇困難症既我地最後都係揀左個3 course dinner，有頭盤，主菜同埋甜品。

頭盤:

是日餐湯係椰菜花忌廉湯，忌廉湯好Creamy，椰菜花味都算濃，配埋香脆蒜蓉多士，十分美味

三文魚他他配香草乳酪汁: 切方粒的三文魚，配左他他汁，魚既鮮味到更為突出，加左少少沙律菜同蕃茄碎， 入口實在清新開胃。

主菜:

葡汁香辣燒香雞: 雞件燒至表面金黃，但係肉質依然能夠保持Juicy，一D都唔會鞋口。至於雞面頭既醬，有陣紅辣椒同蒜頭味，醃得D雞都幾入味。至於配菜有薯條同沙律， 粗身既薯條比幼身既更有口感，又熱又脆，好好味，唯一美中不足既係比較上油，不過一路食薯條一路食下D沙律，相信感覺會無咁油

美式頂級八安士嫩牛柳配大蝦: 牛柳中間切開，中心為粉紅色，肉質嫩滑之餘仲好有彈性， 5成左右的熟度，配上少少黃芥辣，真係好好味。至於大蝦，味道鮮甜仲啖啖肉，點埋附送綠色既香草蓉醬，好味道。

甜品:

是日廚師推介- Panna Cotta: 中間白色又香又滑，texture 有少少似布丁，配上朱古力醬， 有點兒過甜，非小妹喜歡既甜品類型。

朱古力脆脆香滑雲呢嗱籽雪榚: 紅色雜莓醬上面放上朱古力脆脆，再配上雲呢拿籽雪糕， 賣相非常靚，朱古力脆脆十分香脆， 甜度剛剛好，不過小妹對雜莓醬一般，如果落少D，可能會更能夠食得到朱古力脆脆既味道。

飲品:

Mojito:呢杯Mojito 係由青檸汁，有氣礦泉水，薄荷等等既材料整成既，有得揀有酒精同無酒精，唔多好酒既我揀左無酒精，一入口感覺好清新，薄荷同青檸味夠重，不過可能我飲得太慢，D冰又溶得快，飲飲下味道開始變淡，建議大家要求少冰同埋唔好飲咁耐，為求飲到飲品應有既味道。

Cappuccino:咖啡味相當香濃，有別於一般西餐廳飲到既。

總括黎講，呢度環境幾好，食物仲唔錯，無咩「豉油西餐」既感覺，價錢仲幾合理，酒精飲品又多選擇，真係幾適合一班朋友上黎傾計食飯呀。

openrice link: http://www.openrice.com/zh/hongkong/r-the-grill-room-%E9%8A%85%E9%91%BC%E7%81%A3-%E8%A5%BF%E5%BC%8F-%E7%87%92%E7%83%A4-r446983

地址: 銅鑼灣駱克道459-461號The L. Square 5樓