餐廳裡面環境唔錯，安靜之餘又帶俾客人一種歐洲風格，配埋少少燭光，帶俾客人少少聖誕同浪漫氣氛，鍾意聖誕節既我真係幾鍾意呢度既環境。
晚餐方面可以揀一人餐，二人餐又或者係a la carte，由於二人餐有牛肉，唔食牛肉既我梗係揀一人餐啦。
每個一人餐都有餐包，餐湯，沙律，主菜同埋一杯飲品。
麵包係意式香草包，厚得黎仲好鬆軟，熱辣辣，味道唔錯。
餐湯係南瓜湯，個湯賣相好靚，好重瓜味，加埋忌廉之後飲落口好香滑，配埋跟香草包，真係完美既組合。
特選沙律配煙三文魚既菜又新鮮又爽口，加埋份量適中既沙律醋同埋煙三文魚，好醒胃，件三文魚仲整成花型咁，好靚呀。
香草炸兔仔腿配黑松露菌蘑菇意大利飯: 本人雖然對兔肉麻麻地，但係就非常鍾意食蘑菇意大利飯。呢個意大利飯軟硬適中，加入黑松露菌香令到個飯更加香口，至於兔仔腿本身味道唔錯，但係一向好鍾意兔仔既我真係唔忍心食佢條腿呀。
食完主菜後侍應就幫我地落埋餐飲，同時俾埋甜品餐牌我地，可惜我地都已經好飽，食唔落甜品啦，如果唔係都想試下佢地個麵包布丁呀。
openrice link: http://www.openrice.com/zh/hongkong/r-okapi-%E5%B0%96%E6%B2%99%E5%92%80-%E8%A5%BF%E5%BC%8F-r32229
No comments:
Post a Comment