澳門翠苑餐廳 (旺角)

不久之前見到朋友臉書上載左一張咖喱配農夫包既相，覺得好得意，好鍾意食咖喱既我梗係搵機會黎試下啦。

位於旺角熟食中心既澳門翠苑茶餐廳，朗豪坊行過去都係2分鐘左右，平日夜晚7點鐘黎到，剩返既位唔係咁多，都係要等下架啦，而咁多間食店當中，最吸引既當然係呢間澳門翠苑茶餐廳啦。雖然係係熟食市場裡面，但係叫完野食唔使自己拎，仲有專人送餐添，除此之外呢度都算幾乾淨添。

睇過餐牌之後，唔駛諗就已經決定叫呢個咖喱雞農夫包啦。等左10分鐘左右，終於有得食啦。一個餐有農夫包配雞，咖喱汁，飲品，仲有羅宋湯。

個餐送到上黎既時候，真係嚇左一跳呀，好大個包呀，仲要有鍚紙包住，咖喱汁另上，最貼心既係有埋手套，方便客人用手食包，比某著名美式炸雞快餐店更加貼心呀。

我急不及待就打開左個包，個包中間有個洞，好似一隻碗咁，入面有好多雞，無十件都有八件呀！個包外脆內軟，一路食一路係度點D咖喱汁，正到爆呀。

羅宋湯料落得夠足，仲要好夠蕃茄味，一向都鍾意食蕃茄既我真係覺得佢好好飲。

其實一個餐對於一個女仔黎講份量真係有D多，2個女仔Share就差唔多啦。

Openrice: http://www.openrice.com/zh/hongkong/r-%E6%BE%B3%E9%96%80%E7%BF%A0%E8%8B%91%E9%A4%90%E5%BB%B3-%E6%97%BA%E8%A7%92-%E6%B8%AF%E5%BC%8F-r15438

地址: 旺角上海街557號旺角熟食中心2樓8號舖