是日約左一個住大圍嘅朋友食飯，佢介紹黎呢間近港鐵站嘅Amplifier Restaurant。
座位有分室外同室內，室外嘅座位方便吸煙嘅朋友，至於室內，環境同佈置都非常舒服，座位有梳化椅同埋普通座位揀。
餐廳比較特別之處係逢星期三晚上訂座嘅客人可以於Live show 時間自選一首歌唱, 參加者仲可以有折扣優惠，真係相當適合想哄女仔嘅男仕們呀。
晚飯時間食物選擇好多，唔想左揀右揀嘅我地決定試以下呢個二人餐。
二人餐有兩個前菜，兩碗湯，兩個主菜，一份甜品同埋兩杯飲品。
前菜我地揀左Parma Ham同埋雞翼。
意式帕爾馬火腿蜜瓜：
Parma Ham入口感覺非常清新，鹹香度唔算高，食得出風乾味。哈蜜瓜香甜多汁，同Parma Ham一齊食絕對夾到痺。
水牛城雞翼：
水牛城雞翼賣相好得，顏色紅紅地，醬汁又酸又辣又夠多，食落都幾開胃。最重要嘅係D雞翼係焗而唔係炸，比較上健康D。一客有4隻，份量剛剛好。
兩款前菜都配上沙律菜，加左醋嘅沙律，入口酸酸地，非常開胃。
餐湯可以揀牛肝菌忌廉湯或者龍蝦湯，我揀左龍蝦湯。
龍蝦湯：
龍蝦湯顏色偏淡，不過聞落好香龍蝦味，飲落好creamy，味道濃而不過鹹，唯一美中不足嘅係入面無料，如果可以加少少龍蝦肉，咁就完美啦。
餐湯配有新鮮烤焗嘅蒜蓉包，熱辣辣仲好香脆，值得一讚。
主菜揀左一個意粉同埋一份鴨脾。
自家蕃茄醬活青口扁意大利粉：
意粉條條分明，軟硬度適中，熟度剛剛好，完全做到al dente。蕃茄醬汁味道香濃，仲食到好多蕃茄蓉，好有口感。配料方面共有5隻青口，肉質非常鮮嫩，值得一讚。
慢煮油鴨脾伴燴紅椰菜：
油封鴨脾係法國菜中嘅經典傳統美食之一，製作需時，用鹽醃過嘅鴨脾以「油封」方式泡係鴨油中，再以低溫慢煮嘅手法黎保留肉質嘅柔嫩鮮美。
呢度嘅鴨脾唔單止肉厚，而且皮下脂肪均勻分佈，經過長時間低溫油封後，鴨脾肉質柔軟而結實，味道酥香。
甜品有拿破崙，咖啡奶凍同埋芝士蛋糕，配上好香玫瑰味嘅Rose Latte，為我地今晚嘅晚餐劃上完美句號。
Openrice link: https://www.openrice.com/zh/hongkong/r-amplifier-restaurant-大圍-西式-all-day-breakfast-r571420
地址：大圍積福街72號地下D號舖
No comments:
Post a Comment