位於尖沙咀加拿分道嘅「黃記煌」，主打燜鍋，有十幾款唔同嘅選擇，有海鮮有牛有雞有豬，而每一款仲可以從三款傳統秘製宮廷醬汁中揀一款，包括招牌鹹鮮汁，香辣豉皇汁同埋香辣汁。
今日我地揀嘅係「海鮮大軍燜鍋」，喜歡食辣嘅我地當然揀香辣汁啦。值得一讚嘅係店方提供兩種唔同辣度嘅香辣汁，咁就可以迎合唔同口味嘅客人啦。
落單之後，店員好快就為我地送上一個紅色橢圓形嘅壺，裡面裝住唔同嘅材料，店員係我地面前慢慢逐層逐層咁打開，又精緻又整齊地放係鍋度，十足冬至時食到嘅盤菜咁。
第一層蔬菜，有蒜頭，紅棗，洋蔥，彩椒同埋紅蘿蔔。
第二層係海鮮，有白蝦，紅魚柳，廣島蠔同埋墨魚仔。
第三層係我地選擇嘅香辣醬。
而最底果層係芫茜。
鍋裡面嘅食物煮過後好快就食得，打開蓋後更散發出陣陣香味，真係令人流晒口水。每件食材都掛上廚師炮製嘅辣汁，極有層次感，小辣嘅辣度對於喜歡食辣嘅我黎講真係剛剛好，醬汁亦都帶出左各款海鮮嘅鮮味，白蝦同墨魚仔相當彈牙，紅魚柳入口嫩滑，廣島蠔都相當爽口。隨著烹調時間，醬汁會變得越來越杰，當我地食到七七八八時店員就幫我地加湯，開始打邊爐啦。
我地選擇嘅配料有香菇貢丸 ， 韭菜餃，油麥菜同埋紅薯粉 ，值得一提嘅係呢度部分食物可以叫雙拼，絕對適合想試多d野食胃口又唔大嘅朋友。
呢度有「許留山」嘅飲品提供，相信係有合作關係，食完辣野飲返杯香甜嘅「芒椰奶西」同埋「粒粒芒果爽」解辣，近乎完美嘅晚餐令到我地今晚感到非常滿足。
地址： 尖沙咀加拿分道16號金輝大廈1樓
openrice link: https://www.openrice.com/zh/hongkong/r-黃記煌三汁燜鍋-尖沙咀-京菜-官府菜-雞煲-r536872
No comments:
Post a Comment