早幾日係面書見到餐廳介紹七月推出嘅「魚蝦蟹HooHeyHow」下午茶餐，以「魚」、「蝦」、「蟹」為題，食材配搭創新，賣相相當吸引，又有各式各樣嘅鹹點甜品，就決定趁星期六放假黎試下。
由於一早訂左檯，所以黎到唔洗等位就可以入座。
等左大約15－20分鐘之後，期待已久嘅tea set終於到啦，有別於一般西式tea set 用到嘅多層架，今日嘅食物係用轉盤黎上菜，賣相相當精緻，睇得出廚師係非常用心嘅，我地亦都忍唔住「相機食先」。
呢個tea set 嘅鹹點及甜點包括：黑椒雞粒伴約瑟布甸、牛油果蝦多士卷、吉列蟹棒、香脆蟹仔紫菜蛋糕、冬瓜蘑菇蓉紅菜頭撻、黃金蘋果金寶、鮮果漢堡雪糕、杏仁豆腐錦鯉、白骰朱古力以及葫蘆蝶豆花鬆餅。
鮮果漢堡雪糕：
開頭望落以為係普通漢堡,但上檯後店員好細心地提醒要係雪糕溶之前食,先知道原來係雪糕漢堡,朱古力雪糕配上士多啤梨及奇異果,夾埋麵包食感覺相當冰涼。
黑椒雞粒伴約瑟布甸：
醃過嘅雞粒配上迷你嘅約瑟布甸食，細細件，好易入口，味道鹹鹹地，帶少少黑椒嘅味道，都幾惹味，如果可以大件d嘅話咁就好喇。
牛油果蝦多士卷:
蝦多士就食得多,配牛油果食真係第一次,牛油果嘅微甜同蝦多士好夾,而且更可以減低油膩感,咁就唔會有飽飽滯滯嘅感覺啦。
杏仁豆腐錦鯉:
造型相當精緻,杏仁豆腐口感好滑,味道微甜,杏仁味唔太重,令一向唔太鍾意食杏仁嘅我都覺得好好味。
葫蘆蝶豆花鬆餅:
鬆餅係西式下午茶中算係不可缺少嘅一樣食物，呢度嘅鬆餅帶輕輕嘅牛油味，上檯時仲係暖暖地，配上鮮忌廉同果醬食，真係相當有英式風味。
白骰朱古力:
賣相的的骰骰,每一面都有唔同點數,造工精細,真係有d唔捨得食,白朱古力好幼滑,味道唔太甜。
Tea set 包兩杯飲品，我地毫不猶疑地揀左熱咖啡。食完咁有特色嘅下午茶後,當然要嘆返杯即磨咖啡,咖啡味道香濃,替美味嘅食物增添色彩，亦都為我地今日近乎完美嘅下午茶劃上句號。
openrice link: https://www.openrice.com/zh/hongkong/r-espuma-尖沙咀-多國菜-甜品-糖水-r175038
地址：尖沙咀厚福街8號H8 2樓
No comments:
Post a Comment