Cafe Paradise (杏花邨）

早前係朋友嘅面書上見到呢間以旋轉木馬為主題嘅餐廳，見到無論食物同環境都非常吸引，雖然地點相當遙遠，但係都想黎呢度試下。

好唔容易終於黎到位於杏花新城嘅Café Paradise  ，從餐廳門口望入去都已經見到旋轉木馬同埋好多毛公仔，入到去當然第一時間影相啦。

影完相後，係時候揀野食啦。

晚飯時段除左有套餐之外，仲可以揀a la carte。我地揀左一份套餐，包湯，沙律，主菜，咖啡或茶同埋甜品，另外再散叫一個pizza。

是日餐湯: 

南瓜湯相當重南瓜味，味道濃郁，入口好滑，值得一讚。

田園沙律：

沙律菜新鮮爽口，加入左麻醬後食落相當開胃。

千島海鮮滋味薄餅(海蝦/蟹柳/青口/菠蘿/千島醬/蕃茄醬）：
呢個薄餅係即叫即製，所以製作需時。薄餅薄身而脆口，加入蕃茄醬，千島醬，菠蘿，青口，蟹柳，海蝦同芝士去焗，材料相當豐富，味道一絕，芝士味亦都唔重，無肥膩既感覺，適合唔多好芝士嘅我，值得一讚。

美式BBQ豬排骨：

豬肋骨賣相好靚，份量都幾多，豬肋骨既醬汁相當香濃，醃得好入味，肉質方面都幾嫩滑，雖然附上黑椒醬同燒烤醬，但係唔洗點都已經好夠味啦。配菜方面有薯蓉，粟米同翠玉瓜，令到整體賣相更佳。

玫瑰花茶：

套餐包一杯咖啡或茶，亦都可以加錢轉其他飲品，我地加左＄25 轉玫瑰花茶，帶清香玫瑰花味嘅花茶以透明嘅茶壺煲住，可以慢慢嘆，唔洗驚會變凍。

黑森林香草窩夫：

套餐包甜品一份，是日甜品係抹茶奶凍，本人興趣不大，店員就介紹我地加錢轉餐牌上其他嘅甜品，我地就加左＄35轉黑森林香草窩夫。

窩夫賣相非常吸引，蛋味濃郁，脆卜卜咁，好好味，加埋香濃嘅朱古力味雪糕後，味道好夾，令喜歡食甜品嘅我非常滿足。

呢度無論環境同食物都非常吸引，價錢亦都適中，真係好適合同朋友情人一齊黎食飯影相呀。

Openrice link: https://www.openrice.com/zh/hongkong/r-cafe-paradise-杏花邨-西式-all-day-breakfast-r571273

地址：杏花邨盛泰道100號杏花新城地下G53A號舖