近排食日本菜真係食上癮，繼上次去完居酒屋後，今次想去試omakase，經朋友推介黎到「鮨心 ，旬節」。
呢度嘅omakase set 由$600-$1200不等，我地揀咗稍為平，價值$800嘅set，叫「椿」，有頭盤、刺身3件、料理一份、壽司3件、湯同埋甜品。店員每上一道菜時都會同我地詳細介紹菜式嘅。
頭盤 :
一共六件嘅頭盤，係圓碟上面靚靚鋪排，賣相非常吸睛，分別有 :
水雲髮菜山芋蓉 : 口感似雪琶，入口滑滑地，味道酸酸甜甜，非常開胃
銀魚青椒仔 : 青椒仔上鋪上銀魚，入口香脆，真係意想不到咁夾
千島醬天婦羅蝦 : 蝦肉質感彈牙，外皮炸得香脆，粉漿亦都唔會太厚
菜之花瑩光魷魚 : 魷魚非常新鮮，入口爽口彈牙
蕃薯枝豆豆腐 : 好特別，甜甜地，入口軟淋淋有d似豆腐
螢光魷魚日本大根 : 入口滑之餘仲非常新鮮，大根非常入味，讚
刺身 :
刺身全部都好新鮮，最喜歡嘅當然係牡丹蝦同埋拖羅。
牡丹蝦鋪上櫻花蝦碎，入口鹹鹹脆脆，香脆惹味。
拖羅切得非常厚身，無筋，用紫蘇葉包住食可以減低油膩嘅感覺。
料理 :
師父為我地準備咗2款唔同嘅料理，我食到嘅係「味噌馬刀貝」，亦即係「蟶子」。
加左炸蒜後入口好香，非常爽脆，簡直無得頂呀。
壽司 :
壽司方面有針魚、小姬同埋馬糞海膽，另再配海綿蛋糕。
由於呢度嘅壽司已經加咗wasabi同豉油，所以店員都無另外上俾我地。
馬糞海膽 :
平時好怕食海膽嘅我，試過呢度嘅海膽後真係一試難忘，因為佢入口非常creamy，味道香甜，一d都唔腥，配埋香脆嘅紫菜後，味道非常夾。
至於海綿蛋糕，入口甜甜地，唔知係心理作用定點，入口好似有d海鮮味。
蜆麵豉湯 :
加入咗蜆嘅麵豉湯，味道濃郁，蜆肉不但肥美而且鮮甜，令麵豉湯味道更加香。
甜品 :
呢個甜品拼盤無論賣相定味道都相當吸引，除咗水果之外，仲有各式各樣極具創意嘅甜品。
櫻餅 :
櫻餅都係第一次試，用櫻花樹葉包住甜甜紅豆蓉，入口煙煙韌韌，好有日式風味。
柚子朱古力：
用牛奶朱古力包住柚子心，做法非常有創意。
煎茶雪糕：
自家製嘅煎茶雪糕，味道濃郁，配埋水果食，令人一口一口咁食過不停。
食完甜品之後，店員為我地送上一杯暖暖嘅抹茶，真係非常窩心，亦都為我地今晚嘅晚餐劃上完美句號。
地址: 旺角彌敦道703-705號金鑽璽2樓
No comments:
Post a Comment