自從上次食完日式鐵板燒後就對高級日式料理越黎越有興趣， 最近係網上發現呢間位於銅鑼灣登龍街嘅「塩玉居酒屋」，見到食物賣相精緻，好想黎試下。
放工後七點幾到達，由於預先訂好檯，所以唔洗等位就可以入座。
我地一行兩人，叫左各式各樣嘅前菜，燒物，壽司同甜品，有部分仲令我特別難忘。
日本溫室蕃茄田園沙律 :
一向好喜歡食沙律嘅我，見到呢個前菜真係非叫不可。呢個用日本溫室蕃茄整嘅沙律，入口鮮甜多汁，一d都唔酸，加入爽口嘅沙律菜同埋沙律汁後，非常醒神開胃。
黑松露白新魚薄切 :
廚師揀左金目鯛黎做呢個菜式，刺身切得非常薄，一碟共有八件，入口好有魚香，黑松露醬同雪盬食，真係有一番風味。
飛機壽司拼盤 :
飛機壽司拼盤一份有八件，賣相非常精緻吸引，海鮮全部都係由日本直送，而每日嘅壽司組合都唔同，今日食到嘅有日本海膽，熒光魷魚，北海道帆立貝，牡丹蝦，劍魚腩，拖羅，黑松茸，同埋穴子。
每一件壽司入口鮮甜肥美，不論從賣相定味道都知道係新鮮貨色。當中海膽尤其鮮甜，一d都唔腥，帆立貝夠厚身而且無雪味，入口嫩滑，味道不錯。 至於拖羅，除左厚切之外，油份相當十足，入口即溶，讚。
鵝肝釀雞翼 :
燒物係呢度嘅招牌菜之一，我地又點可以唔叫呢？
雞翼釀入鵝肝後燒過，外皮香脆金黃，雞肉入口多汁幼嫩，帶輕輕嘅鵝肝味，味道唔會過鹹。
櫻花餅 :
食完各式各樣嘅菜式後我地都想叫甜品。店員係呢個時候向我地介紹呢個「櫻花餅」。起初我都以為係一個餅，經介紹先知原來係一樣似係啫喱嘅甜品。
加入左士多埤梨醬同埋櫻花嘅甜品，賣相相當吸引，入口亦都非常清新，甜甜地，非常好味，更為我地嘅晚餐劃上完美句號。
地址: 銅鑼灣登龍街28號永光中心10樓
No comments:
Post a Comment