薈麵館 (灣仔)

繼年初到訪後就對呢間餐廳念念不忘，晚飯時段唔洗等位，環境清靜，係同朋友情人食飯傾計嘅好地方。


餐牌大致上同上一次黎差唔多，亦都因為之前黎過，好快就揀到想食咩野。



漂爽海蜇皮伴香辣順風耳小青瓜 :
呢碟前菜有三款小食： 有海蜇、雲耳同埋青瓜，賣相非常精緻，海蜇拌左麻油之後非常香，至於青瓜，醬汁香濃而入味，入口微辣，好開胃。



叉燒鮮蝦雲吞撈麵 :
既然餐廳叫「薈麵館」，咁當然出名食麵架啦。今日試嘅係叉燒鮮蝦雲吞撈麵，叉燒軟身鬆化, 配埋蜜汁同埋皮薄餡多嘅雲吞, 味道非常夾。



脆皮蝦春卷:
即叫即炸嘅春卷外脆內軟，蝦肉亦都好多，入口無咩油膩感，唔錯。



香軟懷舊馬拉糕 :
馬拉糕熱辣辣，入口層層鬆軟，亦帶香濃嘅蛋味。

流汁叉燒包 :
比係一般酒樓，呢度嘅叉燒包入口鬆軟，餡料好足，甜而有肉感，輕輕搣開叉燒包，餡料就會慢慢流出，的而且確係「流汁」。

蟹籽燒賣王 :
燒賣皮好薄，豬肉比例剛剛好，加埋蟹籽同新鮮嘅蝦肉，入口非常爽。

食咗咁多野，埋單都唔駛300蚊，可以靜靜地同朋友傾計又唔洗趕住埋單走，咁嘅價錢，真係非常超值。

Openrice link: https://www.openrice.com/zh/hongkong/r-薈麵館-灣仔-港式-粥品-r546941

地址：灣仔皇后大道東183號合和中心7樓709號舖