早前同某電訊公司簽左兩年電話合約，其中一樣附送既禮物係Le Soleil 下午茶餐三位用，今日趁係假日，就同屋企人一齊黎嘆下午茶啦。
餐廳位於尖沙咀帝苑酒店內既空中花園，環境優雅舒適，亦都相當寧靜，絕對係同情人好友談心既好地方。呢度除左供應傳統越南菜外，仲因應香港人口味加入創新法式越南菜餚。
餐廳最近同LC 合作，憑惠顧都可以半價換購指定LC產品。亦都可能係呢個原因，是日下午茶用既器皿大部分都係以佢為主既。
下午茶餐盛惠388/2位，有別於典型英式下午茶，呢度並無三文治同鬆餅，而換上既係越式小食同甜品。
小食既種類好多，有越式春卷、櫻花蝦撻、香芒蝦片、豬肉米紙卷同香茅蝦串配鮮果沙律。甜品方面有迷你拿破崙、椰青果凍、香芒椰子糕、越南拉椰糕、香芒黑糯米同埋蝴蝶酥。
呢度既食材相當新鮮，而所有食物亦都係即叫即整，味道同賣相都相當有水準，最值得一讚既係個椰青果凍，用椰青水整成既果凍放係香濃既芒果汁同西米上，味道同感覺都非常夾，夏日炎炎既天氣下食，絕對可以消暑。
飲品方面，除左一般既咖啡或茶之外，仲有各式各樣既越式特飲可以選擇。我揀既係青檸梳打，叫左少甜既特飲，甜度剛剛好，入口非常清新。
以原價200蚊一位黎講，有酒店級既小食同甜品，配合埋咁好既服務同埋環境，絕對係超值。
地址: 尖沙咀麼地道69號帝苑酒店3樓
No comments:
Post a Comment