一起果醬 (尖沙咀)

離上次黎食「一起果醬」都有成大半年既時間，一直都好懷念呢度各式各樣同果醬有關既食物。

星期日晚7點幾黎到，都唔駛等位，亦都唔係好多人。餐廳用湖水藍為色調，帶俾人好舒服既感覺，同朋友坐低傾計真係唔錯。

玫瑰蘋果醬單骨雞翼:單骨雞翼食起上黎好方便，上面加左少少玫瑰蘋果醬，食落酸酸甜甜，雞同果醬既配合唔錯，雞翼外皮帶點微脆，伴碟既仲有少少沙律，食落感覺好清新。

果醬九宮格多士: 食材其實只有多士同埋果醬，但係感覺非常特別，烘脆左既多士分開九小格，每格都有唔同味道既自家製果醬，口感唔錯，色彩繽紛，賣相都好吸引。

全天英式早餐 (轉牛角包): 
雖然英式早餐係邊度食都係差唔多，但係呢到既英式早餐係配自家製既果醬，仲要用一個小瓶黎裝住，的的骰骰，非常精緻，值得一讚既係茄汁豆係熱既，唔係好多地方會整返熱俾你食。只不過由多士轉牛角包要加14大洋，個人覺得有點兒overpriced。

溫泉蛋卡邦尼意粉: 
一拎出黎已經見到溫泉蛋醬係面，再將蛋汁撈勻，意粉食落唔硬，配料有磨菇，煙肉同洋蔥，白汁再加蛋汁好味道，不過略嫌太多汁，食晒意粉都仲有好多汁剩，如果乾身返少少就更好喇。

果醬雪糕窩夫餅:一份窩夫有成4塊，都幾大份，賣相非常吸引，一個人食一份真係會過多，建議2-3個人share食。
窩夫非常之鬆軟，配上自選既果醬，水果同埋雲呢拿或者乳酪味既雪糕食，一酸一甜，一熱一冷既口感真係幾過癮。唯一美中不足既係伴碟既cream太多，有少少沾到D 水果，建議唧係碟既第二邊，咁怕肥既女仕就唔駛怕食到有cream既水果啦。

openrice link: http://www.openrice.com/zh/hongkong/r-%E4%B8%80%E8%B5%B7%E6%9E%9C%E9%86%AC-%E5%B0%96%E6%B2%99%E5%92%80-%E8%A5%BF%E5%BC%8F-all-day-breakfast-r452856

地址: 尖沙咀松山道15-17號地下D舖