最近身邊實在發生左好多事，要約朋友出街真係有難度，今日難得約左朋友，一行三人決定癲返晚，去食非常邪惡嘅韓式炸雞。
Outdark位於旺角鬧市中，餐廳門口有幅情人鎖牆，情侶可以俾$5買個鎖留下message 掛係度，一齊鎖住大家個心架。除此之外仲可以寄postcard俾未來嘅自己，只要將postcard放入餐廳內嘅郵箱，佢地就會係一年後寄返俾你架啦，真係好特別呀。
呢間餐廳主打芝士料理，不過由於本人唔好芝士，所以都係叫返d平平凡凡嘅野食。雖然知道炸雞又肥又無益，但係耐唔耐食下都唔算過份嘅。
雙拼炸雞：
炸雞可以揀半份，一份，又或者雙拼，味道有五款，分別係原味，醬油，甜辣，香蒜蜜糖同埋辛辣，有選擇困難嘅女仕們，當然揀左雙拼啦，味道方面就揀左原味同埋甜辣。
每一份炸雞都會拼薯條，薯角同薯格，炸雞外皮好薄，肉質鮮嫩又無骨，食落啖啖肉，非常滋味，甜辣味方面更具韓式風味，唔講都唔知原來自己仲係香港。
每份炸雞都配四款醬汁，分別係燒烤醬、蜜糖芥末、蜜糖同埋甜辣醬，不過個人認為唔洗點醬已經好夠味啦。
海鮮炒粉絲：
韓國粗身粉絲爽口彈牙，加入左醬汁、蜆肉、蝦肉同魷魚炒過後又香又入味，好好味！
海雲台泡菜煎餅:
煎餅最怕就係多油，呢度嘅泡菜煎餅整起黎不但唔油，食落仲外脆內軟，辣味又夠濃郁，有令人一件接一件吃的衝動，最值得一讚嘅係個餅唔係整個上，而係廚師切開一件件後再鋪到靚靚上檯架。
Outdark Ade- Grapefruit:
呢排真係無咩mood飲酒，所以揀左餐牌上嘅non-alcoholic drink。呢杯grapefruit Ade係餐廳自己調製，味道唔會太甜，用黎送炸雞簡直一流呀。
地址：旺角彌敦道613號飛達商業中心2樓
No comments:
Post a Comment