最近係尖沙咀美麗華開左一間新嘅韓式餐廳，主打韓式炸雞同埋pizza。
餐廳以開放式嘅設計為主，感覺好開揚。我地一行兩人，叫唔到好多野，而餐牌裡面大多數食物都係飽肚野，最後揀左一個pizza，一份炸雞同埋一份年榚。
Pizza款式好多，不過話明食韓國野，pizza緊係要揀韓風架啦。平時無咩機會食泡菜pizza，所以今日揀左泡菜海灣（牧場醬底）。
Pizza火喉剛剛好，配料有鮮蝦，蟹柳，菠蘿，火腿，粟米，燈籠椒，牧場醬，泡菜蛋黃醬，馬蘇里拉芝士，紫洋蔥，蘑菇同埋香芹片，材料好豐富，牧場醬底配埋多樣材料，入口唔會過濃，整體味道好夾，亦都唔會蓋過海鮮嘅味道。
甜辣秘製炸雞（非辛辣）
韓式炸雞相信係食韓國野不可缺少嘅菜式之一。我地揀左一份大炸雞，共有十二件。
炸雞入口非常好脆，又唔會太油，配左甜辣醬後，入口一d都唔乾身，醬汁甜甜地，帶微辣，食落都好開胃。
火辣海鮮年糕
無辣不歡嘅我點都要揀返樣辣野食。呢份「火辣海鮮年糕」，材料除左有韓國年糕之外，仲有粉絲，藍青口，鮮蝦，魷魚同椰菜，當然唔少得有辣番茄醬啦。
加入左咁多配料嘅炒年榚，材料非常豐富，年榚軟硬度剛剛好，醬汁又濃郁，真係令人一啖一啖咁食過不停。
連埋飲品，埋單每人都係二百零蚊，可以食到d咁正宗嘅韓國菜，環境又舒適，咁嘅價錢，算係唔錯架啦。
地址：尖沙咀彌敦道132號美麗華廣場一期食四方4樓408號舖
No comments:
Post a Comment