是日係晚飯時段，亂打亂撞下發現觀塘駿業街中海日升中心開左間Marine Seafood Grill and Bar，主打生蠔同海鮮，見價錢適中，又心血來潮想食生蠔，就入左黎試下啦。
Stella Maris M Size (Korea):
生蠔有多達五個選擇，由$9 到$49一隻不等，係店員介紹下我地揀左Stella Maris M Size (Korea)，今日剛剛新鮮到港，生蠔品質非常出色，肉身飽滿，口感清脆，海水味適中，容易入口，配埋檸檬汁同茄汁食，非常好味。
炸孜然單骨雞翼：
除左生蠔之外，我地都另外叫左份雞翼。雖然係油炸，但係入口唔會好油，味道香口，雞翼外脆內嫩，配埋泰式辣醬食，酸酸甜甜咁都幾開胃，真係有一番風味。除此之外，單骨嘅佢亦都令我地容易進食，唔洗吐骨。
牛油焗春雞：
主菜我地要左牛油焗春雞，雖然製作需時，但係賣相真係相當吸引。除左有大大隻嘅雞之外，仲有車厘茄，蕃薯蓉，蕃薯粒，蘑菇同埋薯角做配菜，整體顏色配搭唔錯。
春雞焗得剛剛好，帶輕輕嘅牛油味，肉質香嫩幼滑，入口非常juicy，配埋燒汁食，非常惹味，認真唔錯。
計埋飲品，埋單每人大約＄300左右，係周末同朋友一齊黎嘆下生蠔食下飯輕鬆一下，呢度都算係唔錯嘅選擇啦。
No comments:
Post a Comment